{ 18 April 2025 }

Daar is ‘n roete van 3km uitgelê deur Vredefort dorp. Elkeen wat deelneem bring ’n kruis saam om die roete saam met die konvooi te stap. Die dag se bedrywighede skop af om 10:30 op die 29ste Maart 2024, Goeie Vrydag. Almal kom by die Sportgronde van Vredefort bymekaar. Aanwysings na die sportgronde sal onder aan die blad gevind kan word. Parkering sal aangewys word. Daar gaan ‘n 3000 sitplek tent opgeslaan word waarbinne die verrigtinge gaan plaasvind, en elkeen is welkom om homself tuis te maak enige plek binne die tent. Die verrigtinge sal aangekondig word soos wat die program verloop. Vredefort se eie talentvolle sangers tree op in ‘n voorprogram van 10:30 tot 11:00 op die verhoog. ‘n Kinderprogram word aangebied by die kinderarea agter die verhoog van die groot tent. Ouers is welkom om hulle kinders in die bekwame hande van El Sali-kleuterskool se personeel te los vir ‘n gepaste kleuterprogram, en hulle later te enige tyd weer te kom haal tydens die dag se verrigtinge. Daar sal genoeg kos- en koeldrankstalletjies langs die veld wees, en diegene wat hulleself wil opvul vir die Kruistog is welkom om daar ‘n draai te maak vanaf 10:00 die oggend. Na afloop van die openingsrede om 11:00 word daar ‘n lofprysing- en aanbiddingsprogram aangebied deur Vredefort se eie bekwame sangers Richann Brussouw en Andries D’Alebout. Na afloop van die samesang word die Kruistog reëlings oorgedra en nagmaal word ingestel. Na afloop van die nagmaal beweeg almal buite die tent om die Kruis-formasie te doen. Dit is in die vorm van ‘n groot kruis wat uitgemerk is op die rugbyveld. Almal staan rondom die lyne, en die fotograwe neem ‘n foto uit die lug. Daarna (rondom 12:00) sal die Kruistog ‘n aanvang neem, en sal die Kruistoggangers genooi word om die vlotte te volg vanaf die sportgronde op die roete. Die idee is dat soveel as moontlik mense met hulle kruise sal stap. Die pas sal gematig wees, en kinders sowel as bejaardes sal gemaklik kan stap, en elkeen kan teen sy eie tempo vorder. Mense is welkom om in groepe, of as individue te stap, daar is nie reëls met betrekking tot die stap nie. Die roete behoort nie meer as ‘n uur te neem nie. Vir diegene wat nie kans sien om te stap nie, sal daar verskeie wildsbesigtiging-voertuie wees wat mense kan neem op die roete. Sou daar verder behoefte wees, kan Kruistoggangers ook met hulle voertuie agter die konvooi aanry, alhoewel ons graag voertuie in die konvooi so min as moontlik probeer hou ter wille van verkeersreëlings.  

Soos wat die Kruistog terugkeer na Vredefort Sportgronde, sal elkeen wanneer hy onderdeur die rugbypale gaan ‘n aandenking ontvang. Almal is dan welkom om iets te ete te kry en te ontspan terwyl die musiekspan verdere lofprysing- en aanbidding op die verhoog gaan doen. Daar gaan ook ‘n afsonderlike bedieningstent wees, waar enige iemand heen kan gaan vir gebed en berading soos wat daar behoefte daarvoor ontstaan. Mense is welkom om lekker saam te sing, net te sit en luister, tyd in gebed deur te bring, die wonderlike atmosfeer net in te neem, of om gesellig saam met jou familie piekniek te hou terwyl die musiek in die agtergrond speel. As jy graag ‘n piekniek mandjie, of jou eie eet- en drinkgoed wil saambring, wees welkom!